O Club Ciclista CORRECAMIÑOS de Lugo comeza as súas andanzas no panorama do ciclismo a finais do ano 1998 coma un pequeno grupo de amigos coa intención de fomentar este deporte na nosa cidade.

É nese intre cando sentimos a necesidade de formalizar dalgún xeito a actividade que a maioría de nós estabamos a facer desde había anos e cando atopamos un grupo de persoas o suficientemente estable e homoxéneo. Nestes anos incorporamos novos compoñentes ao club, sempre mantendo a estrutura familiar e o bo ambiente entre nós, hoxe somos ao redor dunha vintena de persoas ás que nos encanta a práctica do ciclismo en todas as súas modalidades: Montaña e Ciclismo en Estrada, Competición e Cicloturismo.

Así, aínda que a maioría de nós nos decantamos pola bici de montaña tamén hai quen prefire exclusivamente a estrada para practicar este deporte no seu estilo máis clásico, iso si, ningún intentou emular aos seus ídolos meténdose no mundo da competición. A diferenza destes, algúns dos nosos ciclistas de montaña fixeron os seus pinitos na competición, participando no Open Galego de Rally e nalgunha proba puntuable para o Open de España, ademais dos campionatos autonómicos e estatais nas súas distintas edicións anuais, acadando bastantes éxitos individuais.

O resto confórmase con acudir ás marchas cicloturistas que se organizan por toda España. De feito, e debido á nosa localización xeográfica, probablemente sexamos máis coñecidos pola nosa presenza en probas celebradas en Asturias e Castilla-León que nas que se fan na nosa propia Comunidade Autónoma.

Coa nosa continua participación neste tipo de probas era lóxico que nos pediran que nós mesmos organizáramos unha marcha cicloturista, e visto que na nosa zona a demanda no apartado de estrada estaba ben cuberta, no ano 2000 empezamos a organizar la "Marcha Cicloturista BTT San Froilán", única destas características que se celebra nesta cidade, e que seguimos realizando coincidindo coas festas patronais de Lugo.

Tras isto chegou a organización do "BTT Concello de Lugo de Rally" no ano 2002, proba puntuable para o Open Galego. O abandono á hora de programar probas deste tipo en toda a provincia parecíanos imperdoable, polo que decidimos organizar esta proba para dar unha oportunidade de participar na competición tanto aos membros do noso club como a todos aqueles que quixeran iniciar nesta modalidade sen ter que realizar un longo desprazamento a outras provincias onde son habituais estas carreiras.

Na actualidade, estamos a intentar realizar probas que atraian a máis xente ao mundo da campetición e que segan convenzendo aos que xa competían.

Se che gusta o ciclismo, tanto na súa modalidade de montaña como na de estrada, anímate a sacar a licenza connosco. Toda a información que necesites non dubides en porte en contacto connosco, ben por teléfono: 982.250.138 ou por correo: club@correcaminoslugo.com.